തിരുവനന്തപുരം: കേരളത്തില് കൊവിഡ് വ്യാപനം രൂക്ഷമായ സാഹചര്യത്തില് ഡബിള് മാസ്ക് ധരിക്കേണ്ടതിന്റെ പ്രാധാന്യം വിശദമാക്കി മുഖ്യമന്ത്രി പിണറായി വിജയന്. കേരളത്തില് കേസുകള് കൂടി വരുന്ന അവസ്ഥയാണ് ഉണ്ടായിരിക്കുന്നത്. അതിനാല് തന്നെ വിവിധ വിദേശ ശാസ്ത്ര സ്ഥാപനങ്ങളുടെ പഠനം നാം കാണേണ്ടതാണ്. കൊവിഡ് വിജയകരമായി പ്രതിരോധിച്ച പ്രദേശങ്ങളില് നടത്തിയ പഠനത്തില് ഇവിടങ്ങളില് മാസ്ക് വയ്ക്കണമെന്ന നിയമം കര്ശ്ശനമായി നടപ്പിലാക്കിയിരുന്നു എന്ന് അവര് കണ്ടെത്തി.
മാസ്കുകളുടെ ശാസ്ത്രീയ ഉപയോഗംകൊവിഡിനെ തടയാന് എത്രത്തോളം ഉപകാരപ്രദമാണ് എന്നതാണ് പഠനങ്ങള് ചൂണ്ടിക്കാട്ടുന്നത്. വീടിന് പുറത്ത് എവിടെയും ഡബിള് മാസ്ക് ഉപയോഗിക്കുന്നത് പ്രധാനമാണെന്ന് പലതവണ വ്യക്തമാക്കിയതാണ്. പ്രധാനപ്പെട്ട കാര്യമായതിനാല് ഈ കാര്യം വീണ്ടും ഓര്മ്മിപ്പിക്കുകയാണ്. ഡബിള് മാസ്ക് എന്നത് രണ്ട് തുണി മാസ്ക് ധരിക്കുക എന്നതല്ല. ഒരു സര്ജിക്കല് മാസ്ക് ധരിക്കുക എന്നതാണ്.
ഇത്തരത്തില് മാസ്കുകള് ധരിക്കുകയും, കൈകള് ഇടയ്ക്കിടയ്ക്ക് ശൂചീകരിക്കുന്നതും കൊവിഡ് രോഗബാധ തടയാന് സഹായിക്കും. മാസ്ക് ധരിക്കുന്നതിന്റെ പ്രധാന്യം ജനങ്ങളെ ബോധവത്കരിക്കാന് വ്യക്തികളും സംഘടനകളും മുന്നോട്ട് വരണം. സിനിമ സംസ്കാരിക രംഗത്തെ പ്രമുഖരും, മതമേലധ്യക്ഷന്മാരും, സാഹിത്യകാരന്മാരും, രാഷ്ട്രീയ നേതാക്കളും, മാദ്ധ്യമപ്രവര്ത്തകരും എല്ലാം ഇതിന്റെ ബോധവത്കരണത്തിന് മുന്നോട്ട് വരണം.
അത്തരത്തിലുള്ള ഇടപെടല് നമ്മുടെ അയല് രാജ്യമായ ബംഗ്ലദേശില് വലിയ മാറ്റം ഉണ്ടാക്കിയിട്ടുണ്ടെന്ന് പഠനങ്ങള് വന്നിട്ടുണ്ട്. ഇത് നമുക്ക് മാതൃകയാകണം. ഓഫീസിടങ്ങളിലും, ജോലിസ്ഥലങ്ങളിലും മാസ്ക് ഉപയോഗിക്കുന്നതില് അലംഭാവം ഉണ്ടാകുന്നുണ്ട്, ഇത് ശ്രദ്ധിക്കണമെന്നും മുഖ്യമന്ത്രി പറഞ്ഞു..-