കൊവിഡ് മാനദണ്ഡങ്ങൾ ലംഘിച്ചു ; മമ്മൂട്ടിക്കും രമേശ് പിഷാരടിക്കുമെതിരെ പോലീസ് കേസ്..
കോഴിക്കോട്: കൊവിഡ് മാനദണ്ഡം പാലിക്കാത്തതിന് ചലച്ചിത്ര താരങ്ങളായ മമ്മൂട്ടിക്കും രമേഷ് പിഷാരടിക്കുമെതിരെ പോലീസ് കേസെടുത്തു. എലത്തൂര് പൊലീസാണ് കേസെടുത്തിട്ടുള്ളത്.
കഴിഞ്ഞ ദിവസം കോഴിക്കോട് മെയ്ത്ര ആശുപത്രിയില് സന്ധി മാറ്റിവയ്ക്കലിനുള്ള റോബോട്ടിക് ശസ്ത്രക്രിയ വിഭാഗത്തിന്റെ ഉദ്ഘാടന ചടങ്ങിനെത്തിയ ഇരുവരും ആള്ക്കൂട്ടമുണ്ടാക്കി എന്നാരോപിച്ചാണ് പോലീസ് കേസ്.
കഴിഞ്ഞ ചൊവ്വാഴ്ച ഉദ്ഘാടന പരിപാടിക്ക് ശേഷം ആശുപത്രി സന്ദര്ശിക്കാന് ഇരുവരും തീവ്രപരിചരണ വിഭാഗം ബ്ലോക്കിലെത്തിയിരുന്നു. ഇത് ആളുകള് കൂട്ടംകൂടാന് കാരണമായി.
ഉദ്ഘാടന ചടങ്ങ് കൊവിഡ് പ്രോട്ടോകോള് പാലിച്ചായിരുന്നു നടന്നതെങ്കിലും അതിനു ശേഷമാണ് ആളുകള് നടന്മാരുടെ ചുറ്റും കൂടിയത്. സിനിമാ നിര്മാതാവ് ആന്റോ ജോസഫിനും ആശുപത്രി മാനേജ്മെന്റിനെതിരെയും കേസെടുത്തിട്ടുണ്ട്.
ആശുപത്രിയിൽ നടന്മാർ എത്തിയപ്പോൾ മുന്നൂറോളം പേർ കൂട്ടം കൂടിയെന്ന് എലത്തൂർ പൊലീസ് പറഞ്ഞു.