
ഇടുക്കി ജില്ലയിൽ നാളെ എൽഡിഎഫ് ഹർത്താൽ പ്രഖ്യാപിച്ചു. സംരക്ഷിത വനങ്ങൾക്കുചുറ്റും ഒരു കിലോമീറ്റർ പരിസ്ഥതിലോല മേഖല നിർബന്ധമെന്ന സുപ്രിംകോടതി ഉത്തരവിനെതിരെ സംസ്ഥാനത്ത് പ്രതിഷേധം ശക്തമാക്കുന്നതിന്റെ ഭാഗമായാണ് ഹർത്താൽ. സുപ്രിംകോടതി ഉത്തരവ് മറികടക്കാൻ കേന്ദ്ര ഇടപെടൽ ആവശ്യപ്പെട്ടാണ് ഹർത്താൽ സംഘടിപ്പിക്കുന്നത്.
യുഡിഎഫ് ജില്ലയിൽ 16-ാം തീയതി ഹർത്താൽ പ്രഖ്യാപിച്ചിട്ടുണ്ട്. ഞായറാഴ്ച
വയനാട് ജില്ലയിൽ എൽഡിഎഫ് ജനവാസമേഖലകളെ സംരക്ഷിക്കണമെന്നാവശ്യപ്പെട്ട് മനുഷ്യമതിൽ സംഘടിപ്പിക്കും. ബത്തേരി നഗരസഭാ പരിധിയിൽ മുസ്ലിം ലീഗിന്റെ നേതൃത്വത്തിൽ ചൊവ്വാഴ്ച ഹർത്താലും പ്രഖ്യാപിച്ചു.
എന്നാൽ സമരമാർഗങ്ങൾ ഒഴിവാക്കി സംസ്ഥാന സർക്കാർ ശ്രമങ്ങൾക്ക് ശക്തിപകരണമെന്ന് വനംമന്ത്രി എകെ ശശീന്ദ്രൻ പ്രതികരിച്ചു. ഉത്തരവിനെ മറികടക്കാൻ കേന്ദ്രത്തെയും സുപ്രീംകോടതിയെയും സമീപിക്കാനാണ് സർക്കാരിന്റെ നീക്കം.