ഗുരുതര കാലാവസ്ഥ സൂചനയുമായി ഈ വർഷത്തെ കാലാവസ്ഥാ പഠന റിപ്പോർട്ട്. സംസ്ഥാനത്ത് മിന്നൽ പ്രളയത്തിന് ഇടയാക്കുന്ന മേഘവിസ്ഫോടനം ഈ വർഷം ഉണ്ടായേക്കാമെന്നാണ് റിപ്പോർട്ടിൽ പറയുന്നത്. കൊച്ചി കുസാറ്റിലെ ശാസ്ത്ര സംഘത്തിന്റെ കണ്ടെത്തൽ നേച്ചർ മാഗസിൻ പ്രസിദ്ധീകരിച്ചു.
സംഘത്തിന്റെ കണ്ടെത്തലുകൾ അനുസരിച്ച് കേരള തീരത്ത് രൂപപ്പെടുന്ന കൂമ്പാര മേഘങ്ങൾ അപ്രതീക്ഷിതമായ മേഘ വിസ്ഫോടനത്തിന് കാരണമാകും. ഈ വിസ്‌ഫോടനം സംസ്ഥാനത്ത് മിന്നൽ പ്രളയത്തെ സൃഷ്ടിക്കും. 1980-99, 2000-2019 എന്നീ കാലയളവ് അടിസ്ഥാനമാക്കി നടത്തിയ പഠനത്തിലാണ് കാലാവസ്ഥാ വ്യതിയാനം തിരിച്ചറിഞ്ഞത്.
സംസ്ഥാനത്തെ കാലവർഷത്തിൽ അടിമുടി മാറ്റം സംഭവിച്ചതായും കുസാറ്റിലെ ശാസ്ത്ര സംഘത്തിന്റെ പഠന റിപ്പോർട്ടിൽ പ്രതിപാദിക്കുന്നുണ്ട്. രണ്ട് മണിക്കൂറിനുള്ളിൽ 20 സെന്‍റി മീറ്റർ വരെ മഴ പെയ്യാം.
